O Chustizia

Instituzión y Funzions

O Chustizia d’Aragón ye una d’as cuatro instituzions basicas d’autogubierno d’a Comunidat Autonoma, chunto a o Presidén, o Gubierno u Deputazión Cheneral y as Cortes d’Aragón.

Ista posizión, asinas como a suya dilatada istoria, fan d’o Chustizia d’Aragón una entidat singular en a organizazión instituzional española.

As funzions d’o Chustizia son a protezión y esfensa d’os dreitos individuals y coleutivos d’a ziudadanía; a tutela de l’ordinamiento churidico aragonés; y en zagueras a esfensa d’o Estatuto d’Autonomía.

O suyo caráuter d’instituzión; fren a la de comisionau parlamentario, tradizional d’os esfensors d’o pueblo, asinas como as orichinals dos zagueras funzions, aconforman a suya identidat.

L’autual Chustizia d’Aragón, a diferenzia d’o istorico, no chuzga ni dita sentenzias, sino que a traviés d’a fundamentazión d’as suyas resoluzions exerze una machistratura moral.

En o cumplimiento d’a suya competenzia en esfensa d’os dreitos d’os aragoneses, O Chustizia d’Aragón ha de supervisar l’autuazión d’as Alministrazions publicas aragonesas (entre ellas, a propia Alministrazión autonomica, as Deputazions Provinzials, as Comarcas y os Conzellos), bien a traviés de quexas presentadas por a ziudadanía, bien en funzión d’espediens incoaus d’ofizio a iniziativa d’a propia Instituzión.

A tutela de l’Ordinamiento churidico aragonés ye orientada a evitar a suya inaplicazión u defizién aplicazión, de vez que incluye una nezesaria labor d’estudio y difusión d’o Dreito propio, en o cual constituye una parti muito releván o Dreito Foral. Tamién, O Chustizia d’Aragón ha de controlar o respeto d’os reglamentos autonomicos a o Estatuto d’Autonomía y a la resta de l’Ordinamiento churidico aragonés.

Finalmén, O Chustizia d’Aragón tamién s’esferenzia por a suya competenzia en esfensa d’o Estatuto d’Autonomía fren a las posibles infrazions d’os suyos prezeutos por parti de normas y autuazions d’o Estau y d’atras Comunidaz Autonomas.

Istoria

O Estatuto d’Autonomía d’Aragón tornó a dar vida a una Instituzión propia d’o reino d’Aragón abolida en 1707 chunto a os Fueros, a Deputazión y as Cortes.

Ye en 1115 cuan apareixe por primer vez o nombramiento de Chustizia d’o rei, referiu a Pedro Giménez, en un privilechio conzediu por Alfonso I O Batallero a os pobladors de Zaragoza.

Dito cargo, que abió de corresponder a o d’un asesor d’a curia real, pasó a convertir-se en una instituzión propia d’o reino en as Cortes d’Aragón zelebradas en Exeya en 1265, establindo-se ya como un chuez meyo que eslinda os conflitos entre o rei y a nobleza.

En 1283 o Privilechio Cheneral d’Aragón confirma iste caráuter meyador, amplando a suya churisdizión a os pleitos y causas entre os propios nobles.

A o largo d’o sieglo XIV, o prestichio y a presenzia instituzional d’o Chustizia se veye incrementada: no nomás ye o interprete de l’ordinamiento foral, sino que a suya presenzia en as Cortes, presidindo-las en ausenzia d’o rei, reforza a suya posizión entre as instituzions d’o reino.

Debán d’o Chustizia, os reis han de churar o cumplimiento de fueros y observanzias baixo a conoxida formula: “Nos, que somos tanto como vos y toz chuntos valemos más que vos, tos femos rei d’Aragón, si churaz os fueros y si no, no.”

En o exerzizio d’a suya funzión churisdizional acobalta en os causos relazionaus con os dreitos y libertaz, a traviés d’os prozesos forals de siña de dreito y de manifestazión.

Por meyo d’a siña de dreito, un demandau guarenziaba a suya sumisión a la sentenzia sin aber d’amprar capleta, tratando asinas d’evitar que os mesmos podesen veyer-se privaus d’a posesión d’os suyos biens mientres o prozeso.

Con o Prozeso de Manifestazión, os aragoneses demandaban a intervenzión d’o Chustizia ta evitar una detenzión arbitraria u un prozeso no achustau a Dreito, con violenzia u turmento. Ta ixo l’aturato quedaba baixo l’amparo d’o Chustizia en a clamada Garchola d’os Manifestaus an permanexeba dica rezibir sentenzia, sin que garra autoridat podese tener azeso a o mesmo.

A importanzia politica d’o Chustizia no fazió sino aumentar por suzesivas resoluzions d’as Cortes. No podeba estar arrestau, aturau ni empreñau por o Rei ni garra atra autoridat.

Dende 1442 se considera cargo vitalizio, sin posibilidat de destituzión y alquieren muita relevanzia os Lugarteniens, de tal traza que se pasa d’una machistratura personal, a d’o Chustizia, a o Chustiziazgo como instituzión.

Entremistanto, contribuyindo a enfortir o carisma d’a Instituzión, dende o sieglo XIII a o XVI, va prenendo cuerpo a leyenda d’os Fueros de Sobrarbe, que a traviés de diferens cronistas y churistas pretende dar alazet istorico a las peculiaridaz forals aragonesas, emponderando l’orichen y dignidat d’o Chustizia que se quiere anterior a o rei.

A leyenda replegada por Zurita y posteriormén por Blancas sitúa un d’os Fueros de Sobrarbe en istos termins: “Ta que no sofran mal as nuestras libertaz veilará un chuez meyo, a o que será lizito apelar d’o rei si fese mal a belún y refusar as inchurias si talmen as inferise a la republica”.

Con tot ixo, vinió a considerar-se a instituzión d’o Chustizia como a millor guarenzia d’os dreitos d’os aragoneses y como modelo en a esfensa d’as libertaz fren a l’albitraridat d’o poder.

As tensions surtidas debán d’os incomplimientos y omisions d’o poder real fren a os fueros, y a fayena de protezión d’istos encomendada a o Chustizia fa que se cheneren tensions entre iste y os reis cual zenit s’alcanza en 1591.

As revueltaas ziudadanas conoxidas como as Alterazions d’Aragón rematoron con a decapitazión d’o Chustizia Juan de Lanuza V o Mozo por enfrontinar-se a la voluntat d’o rei Felipe II, que eba dentrau en o reino d’Aragón con exerzitos ta reduzir as revueltas que se yeran produzindo, a causa de l’intento d’o trebunal d’a inquisizión d’apercazar y prozesar a Antonio Pérez, natural de Guadalaxara pero de familia aragonesa, aculliu a la churisdizión d’o Chustizia Mayor por meyo d’o dreito de Manifestazión.

En as Cortes de Tarazona de 1592 s’establioron importans restrizions a la fegura d’o Chustizia, que pasa a estar nombrau por o rei, y a las atribuzions d’a Deputazión d’o Reino.

Felipe V, que eba churau en 1701 os Fueros debán d’o Chustizia Pedro Valero suprimió definitivamén a fegura d’o Chustizia, asinas como a resta d’as instituzions aragonesas y os Fueros d’Aragón por meyo d’os Decretos de Nueva Planta.

Nomás que quedoron en vigor os referius a o dreito privau que permanexen dica os nuestros días.

A fegura d’o Chustizia d’Aragón reaparexió en 1982 replegada en o Estatuto d’Autonomía d’Aragón y emparada por a Constituzión de 1978.

As autuals competenzias d’a fegura d’o Chustizia, no se corresponden con as que tenió en o suyo orichen, dimanans d’a naixenzia d’o Reino d’Aragón, anque sí se miró que tenese una posizión instituzional y unas funzions que bien podesen estar suzesoras d’aquellas.

O churista y ponén d’o nuestro Estatuto d’Autonomía, José Luis Merino, escribió que as funzions de l’autual Chustizia s’inspiroron en a definizión que López de Haro fazió d’o mesmo, como: “…defensor d’os fueros y observanzias; zentinela d’as libertaz d’Aragón y vichía d’a constituzión organizadora d’o Estau”.

Por ixo, como “esfensor de fueros y observanzias”, uei se confegura como garán de l’ordinamiento churidico aragonés; como “vichía d’a constituzión d’o estau”, autualmén tiene como una d’as suyas funzions a de esfensor d’o Estatuto; y, en o causo de “zentinela d’as libertaz d’Aragón”, ye o valedor d’os dreitos individuals y coleutivos.

A la finitiva, Aragón recuperó con l’Autonomía, una instituzión que eba permanexiu dende a suya abolizión con os decretos de nueva planta, en o subconszién d’os aragoneses entre sieglos.

O primer Chustizia d’a etapa moderna estió Emilio Gastón, designau por as Cortes d’Aragón en 1987 en un auto cargau de simbolismo que se zelebró en o Salón de Bispes d’o Palazio episcopal de Tarazona en una sesión plenaria estraordinaria.

Gastón churó o cargo debán d’as Cortes y con a presenzia en a sala de l’arqueta que conteneba as restas osias d’o Chustizia Chuan de Lanuza V.

Tanto a calendata como lo espazio estioron triaus de traza simbolica, ya que, en ixe mesmo Salón de Bispes, o 2 d’aviento de 1592, Felipe II refrendó con a suya siña as Cortes de Tarazona de 1592, que suposoron a fin d’a conzepzión d’o Chustizia como contrapoder a o rei.

D’ista traza, quedó restaurada ista instituzión, 395 años dimpués que en o mesmo puesto estase amputada y espullada d’a suya esenzia y funzión.

En 1993 estió triau Chustizia Juan Bautista Montserrat qui exerzió dica 1998, que estió suzediu por Fernando García Vicente dica abril de 2018, momento en que as Cortes d’Aragón trioron a Ángel Dolado Pérez, autual titular y que ye o 70º Chustizia en o cargo.

Tramitazión d’espediens

O prozedimiento previsto ta la guarenzia d’os dreitos y libertaz ye lo d’a quexa.

Iste podrá estar enzetau por as personas fisicas u churidicas que ostenten intrés lechitimo en l’asunto u d’ofizio por o propio Chustizia; igualmén por os Deputaus d’as Cortes d’Aragón y as comisions d’investigazión y a que s’encargue d’as relazions con O Chustizia, asinas como por os miembros d’as corporazions locals en o suyo respeutivo ambito territorial.

As quexas abrán d’estar perén formuladas por escrito, esponendo con claridat os feitos en os cuals se basan y as posibles prebas en relazión a os mesmos.

Son diversas as vías que tiene o ziudadano ta esponer a suya quexa, tals como a entrega presenzial en as propias siedes d’o Chustizia en cadaguna d’as tres provinzias, a traviés d’ista portalada web, por correu eleutronico u fisico y fax.

Totas as autuazions debán de O Chustizia tienen naturaleza gratuita, desichindo-se manimenos a identificazión sufizién d’a persona u personas que formulan a mesma, proibindo-se en consecuenzia a presentazión de quexas anonimas.

Plantiada a zitada quexa, o Chustizia podrá almitir-la a tramite u refusar-la, si bien en iste zaguer causo abrá de motivar tal resoluzión, y informar a o ziudadano d’as vías más adecuadas ta satisfer a suya pretensión, estando as causas más comunas de refuso o tratar-se d’afers entre particulars, existenzia evidén de manca d’irregularidat, estar pendién de resoluzión chudizial u tratar-se d’un asunto en o cual o ziudadano sía disconforme con bella resoluzión chudizial.

Almitida a quexa u iniziau o espedién d’ofizio, o Chustizia d’Aragón adotará as midas d’investigazión que considere oportunas. Podrá dar cuenta a l’organo alministrativo, entidat u corporazión afeutada ta que en o plazo que determine, o suyo responsable le ninvíe un informe escrito sobre a custión suszitada, abendo de recordar-se que as autoridaz, funzionarios y tot o personal dependién de l’Alministrazión abrán de fazilitar a o Chustizia u a aquel en qui delegue, as informazions, asistenzia y dentrada a totas as dependenzias, zentros y organismos.

Igualmén abrán de meter a la suya disposizión os datos, espediens u cualsequier clase de documento que permitan levar a cabo adecuadamén l’autuazión investigadera.

Una vez levada a cabo a labor investigadera, si O Chustizia escubrise irregularidaz en o funzionamiento de l’Alministrazión, o meterá en conoixenzia d’o inmediato superior cherarquico y, en o suyo causo, d’o Ministerio Fiscal (articlo 21 d’a lei 4/85); por unatro costau, o Chustizia podrá formular a os organismos y autoridaz afectaus alvertenzias, recomendazions, sucherenzias y recordatorios relativos a os suyos debers legals, pero as suyas resoluzions no podrán, en garra caso, modificar u anular autos u resoluzions alministrativas.

Dentro d’as sucherenzias formuladas por o Chustizia podrán trobar-se a proposizión de formulas de conziliazión u alcuerdo ta solventar un problema determinau (articlo 22).