El Justicia

Lo Chusticia en aragonés

Instituzión y FunzionsInstitución y Funcions

Lo Chusticia d’Aragón ye una d’as cuatre institucions d’autogubierno d’a Comunidat Autonoma, chunto a lo President, lo Gubierno u Deputación Cheneral y las Corz d’Aragón.

Esta posición, asinas como la suya dilatada historia, fan d’o Chusticia d’Aragón una entidat singular en a organización institucional espanyola.

Las funcions d’o Chusticia son a protección y defensa d’os dreitos individuals y colectivos d’a ciudadanía; la tutela de l’ordenamiento churidico aragonés; y, finalment, la defensa d’o Estatuto d’Autonomía.

Lo suyo carácter d’institución -debant d’o de comisionau parlamentario, tradicional d’os defensors d’o pueblo- asinas como la orichinalidat d’as dos zagueras funcions mentadas aconforman la suya identidat.

L’actual Chusticia d’Aragón, a diferencia d’o historico, no chudga ni dicta sentencias, sino que, a traviés d’a fundamentación d’as suyas resolucions, exerce una machistratura moral.

En o complimiento d’a suya competencia en defensa d’os dreitos d’os aragoneses, Lo Chusticia d’Aragón ha de supervisar l’actuación d’as Administracions publicas aragonesas (entre ellas, la propia Administración autonomica, las Deputacions Provincials, las Comarcas y los Concellos), bien a traviés de queixas presentadas per la ciudadanía, bien en función d’expedients incoaus d’oficio a iniciativa d’a propia Institución.

La tutela de l’Ordenamiento churidico aragonés ye orientada a evitar la suya inaplicación u deficient aplicación, de vez que incluye una necesaria labor d’estudio y difusión d’o Dreito propio, d’o cual constituye una parte muito relevant lo Dreito Foral. Asinas, Lo Chusticia d’Aragón ha de controlar lo respecto d’os reglamentos autonomicos a lo Estatuto d’Autonomía y a la resta de l’Ordenamiento churidico aragonés.

Finalment, Lo Chusticia d’Aragón tamién se distingue per la suya competencia en defensa d’o Estatuto d’Autonomía debant d’as posibles infraccions d’os suyos preceptos per parte de normas y actuacions d’o Estau y d’atras Comunidaz Autonomas.

El justicia de Aragón escudo y texto
Entrada Justicia de Aragón
Edificio Justicia de Aragón

Historia

Lo Estatuto d’Autonomía d’Aragón tornó a dar vida a una Institución propia d’o reino d’Aragón abolida en 1707 chunto a los Fueros, la Deputación y las Corz.

Ye en 1115 cuan apareixe per primer vez la denominación de Chusticia d’o rei, referiu a Pedro Ximénez, en un privilechio concediu per Alifonso I lo Batallero a los pobladors de Zaragoza.

Este cargo, que debió de corresponder a lo d’un asesor d’a curia reyal, pasó a convertir-se en una institución propia d’o reino en as Corz d’Aragón celebradas en Exeya en 1265, an que se va establir ya como un chuez meyo que dirimiba los conflictos entre lo rei y la nobleza.

En 1283, lo Privilechio Cheneral d’Aragón confirma este carácter meyador, amplando la suya churisdicción a los pleitos y causas entre los propios nobles.

A lo largo d’o sieglo XIV, lo prestichio y la presencia institucional d’o Chusticia se veye incrementada: no nomás ye l’interprete de l’ordenamiento foral, sino que la suya presencia en as Corz, presidindo-las en ausencia d’o rei, refuerza la suya posición entre las institucions d’o reino.

Debant d’o Chusticia, los reis han de churar lo complimiento de fueros y observancias baixo la conoxida formula: “Nos, que somos tanto como vos y toz chuntos valemos mas que vos, vos femos rei d’Aragón, si churaz los fueros y si no, no.”

En l’exercicio d’a suya función churisdiccional destaca en os casos relacionaus con os dreitos y libertaz, a traviés d’os procesos forals de Firma de Dreito y de Manifestación.

Per medio d’a Firma de Dreito, un demandau garantizaba la suya submisión a la sentencia sin haber de dar caplieuta, mirando asinas d’evitar que podese veyer-se privau d’a posesión d’os suyos biens mientres lo proceso.

Con o Proceso de Manifestación, los aragoneses demandaban la intervención d’o Chusticia pa evitar una detención arbitraria u un proceso no achustau a Dreito, con violencia u turmento. Pa ixo, lo deteniu quedaba baixo lo emparo d’o Chusticia en la clamada Presón d’os Manifestaus an permaneixeba dica recebir sentencia, sin que garra autoridat podese tener-ie acceso.

La importancia politica d’o Chusticia no fació soque aumentar per sucesivas resolucions d’as Corz. No podeba estar arrestau, deteniu ni molestau per lo Rei ni per garra atra autoridat.

Dende 1442 se considera cargo vitalicio, sin posibilidat de destitución y adquieren muita relevancia los Lugartenients, de manera que se pasa d’una machistratura personal, la d’o Chusticia, a lo Chusticiau como institución.

Entremistanto, contribuyindo a enfortir lo carisma d’a Institución, dende lo sieglo XIII dica lo XVI, va prenendo cuerpo la leyenda d’os Fueros de Sobrarbe, que a traviés de diferents cronistas y churistas mira d’adotar de fundamento historico a las peculiaridaz forals aragonesas, exaltando l’orichen y dignidat d’o Chusticia que se pretendeba anterior a lo rei.

A leyenda replegada per Zurita y posteriorment per Blancas sitúa un d’os Fueros de Sobrarbe en estes termens: “Pa que no padeixcan danyo las nuestras libertaz veilará un chuez meyo, a qui será licito apelar d’o rei si danyase a belún y refusar-ne las inchurias si nunca las inferise a la republica”.

Con tot ixo, vinió a considerar-se la institución d’o Chusticia como la millor garantía d’os dreitos d’os aragoneses y como modelo en a defensa d’as libertaz contra l’arbitrariedat d’o poder.

La tensions surchidas debant d’os incomplimientos y omisions d’o poder reyal frent a los fueros, y la fayena de protección d’estes encomendada a lo Chusticia, va fer que se chenerasen tensions entre este y los reis, tensions que alcanzan lo suyo zenit en 1591.

Las revueltas ciudadanas conoixidas como las Alteracions d’Aragón acaboron con a decapitación d’o Chusticia Chuan de Lanuza V lo Mozo per concarar-se a la voluntat d’o rei Felipe II, qui heba dentrau en o reino d’Aragón con exercitos ta reducir las revueltas que se yeran producindo, a causa de l’intento d’o tribunal d’a inquisición d’apercazar y procesar a Antonio Pérez, natural de Guadalachara pero de familia aragonesa, aculliu a la churisdición d’o Chusticia Mayor per medio d’o dreito de Manifestación.

En as Corz de Tarazona de 1592 s’establioron importants restriccions a la figura d’o Chusticia, que pasó a estar nombrau per lo rei, y a las atribucions d’a Deputación d’o Reino.

Felipe V, qui heba churau en 1701 los Fueros debant d’o Chusticia Pedro Valero, suprimió definitivament la figura d’o Chusticia, asinas como la resta d’as institucions aragonesas y los Fueros d’Aragón per medio d’os Decretos de Nueva Planta.

Nomás quedoron en vigor los referius a lo dreito privau, que permaneixen dica los nuestros días.

La figura d’o Chusticia d’Aragón reapareixió en 1982, recullida en o Estatuto d’Autonomía d’Aragón y emparada per la Constitución de 1978.

Las actuals competencias d’a figura d’o Chusticia no se corresponden con as que tenió en o suyo orichen, que dimanaban d’a naixencia d’o Reino d’Aragón, anque sí se va mirar que tenese una posición institucional y unas funcions que bien podesen estar consideradas sucesoras d’aquellas.

Lo churista y ponent d’o nuestro Estatuto d’Autonomía, José Luis Merino, va escrebir que las funcions de l’actual Chusticia s’inspiroron en a definición que López de Haro en fació, como “defensor d’os fueros y observancias; sentinela d’as libertaz d’Aragón y vichía d’a constitución organizadera d’o Estau”.

Per ixo, como “defensor de fueros y observancias”, hue se configura como garant de l’ordenamiento churidico aragonés; como “vichía d’a constitución d’o estau”, actualment tiene la función de defender lo Estatuto d’Autonomía; y, como “sentinela d’as libertaz d’Aragón”, hue ye lo valedor d’os dreitos individuals y colectivos. A la finitiva, Aragón recuperó con l’Autonomía una institución que s’heba manteniu durant sieglos, dende la suya abolición con os decretos de nueva planta, en o subconscient d’os aragoneses.

Lo primer Chusticia d’a etapa moderna estió Emilio Gastón, designau per las Corz d’Aragón en 1987 en un acto cargau de simbolismo que se celebró en o Salón de Bispes d’o Palacio episcopal de Tarazona en una sesión plenaria extraordinaria. Gastón churó lo cargo debant d’as Corz y con a presencia en a sala de l’arqueta que conteneba las restas osias d’o Chusticia Chuan de Lanuza V.

Tanto la data como lo espacio estioron triaus de traza simbolica, ya que, en ixe mesmo Salón de Bispes, lo 2 d’aviento de 1592, Felipe II referendó con a suya sinyadura las Corz de Tarazona de 1592, que van suposar la fin d’a concepción d’o Chusticia como contrapoder a lo rei.

D’esta traza, quedó restaurada esta institución, 395 anyos dimpués que en o mesmo puesto hese estau retallada y espullada d’a suya esencia y función.

En 1993 estió triau Chusticia Juan Bautista Montserrat, qui exerció lo cargo dica 1998. Lo sucedió Fernando García Vicente, dica abril de 2018, momento en que las Corz d’Aragón trioron a Ángel Dolado Pérez, titular d’a institución dica lo 20 d’abril de 2023.

fachada piedra esculturas
detalle color libro
historia libro abierto

Siede

Lo Chusticia d’Aragón tenió historicament la suya siede en a Casa u Palacio d’a Deputación d’o Reino, plazau chunto a lo Palacio Arcebispal y destruyiu mientres los Sitios de Zaragoza.

Los primers anyos de funcionamiento d’a Institución, la siede va estar en unas oficinas d’a Carrera Sant Chorche, an que tamién heban estau las Corz d’Aragón de traza provisional.

Lo 20 d’aviento de 1995 s’inauguró lo rehabilitau “Palacio d’Armijo” como siede definitiva d’a Institución.
Este vago estió adquiriu en 1147 per lo Cabildo pa acullir la vivienda de l’Arcipestre d’a Seu, función que mantenió pa atros diferents cargos eclesiasticos dica l’anyo 1847, en que estió afectada per la Lei Desamortizadera de 1841, y subhastada pa lo suyo uso civil.

Dende alavez, tenió diferents propietarios … las familias Domec, Andreu, Pastor… Dica que en 1865 la adquirioron los chirmans Armijo, procedents de Córdoba, los cuals la destinoron a casa de vecindat pa inquilinos, transformando-ne buena parte de l’interior y perdendo-ne la fesomía orichinal.

En zaguerías d’os anyos 70, ya en estau de ruena, se fació espaldar parcialment y se consolidó la suya frontera.
En 1981 l’edificio estió vendiu a lo Concello de Zaragoza presidiu per Ramón Sainz de Varanda, qui querió restaurar-lo y recuperar-lo, anque finalment estió cediu a lo Chusticia d’Aragón, qui n’encargó la recuperación y reconstrucción, seguntes la disposición inicial, a los arquitectos Isabel Elorza García y Manuel Fernández Ramírez.

Mantiene actualment las plantas orichinals y se’n han reconstruyiu elementos a partir de piezas orichinals, incluyindo-ie elementos artisticos d’atros edificios como los teitos de tipo “alfarche” provenients de l’antiga casa d’a familia Cavallería, situada en a carrera Cinechio.

Lo palacio ye de reducidas dimensions y consta de cuatre plantas y soterranyo, y sigue la tipolochía propia d’os palacios aragoneses d’o sieglo XVI. En a parte dreita d’a planta baixa d’a frontera principal que da a la carrera D. Chuan d’Aragón ubre la sencilla portalada d’acceso a l’interior en arco de meyo punto. A la zurda, i hai dos obriduras con cabecero descentradas. En a planta noble s’ubren tres balcons i remata con a clasica galería d’arquillos doblaus en arco de meyo punto que corre baixo lo rafe de fusta con grans mensulas que soportan la correya sobre la cual asientan los canez.

En o patio podemos observar un cuadro de pintura historica, pintau en 1864 per López del Plano, que representa los zaguers momentos de vida de D. Chuan de Lanuza.

Palacio de Armijo patio
Palacio de Armijo estancia sofás
Palacio de Armijo sala reuniones

Tramitación d’expedients

O procedimiento previsto pa la garantía d’os dreitos y libertaz ye lo d’a queixa.

Esta podrá estar iniciada per las personas fisicas u churidicas que ostenten interés lechitimo en l’afer, u d’oficio per lo propio Chusticia; igualment, per los Deputaus d’as Cortes d’Aragón y las comisions d’investigación y la que s’encargue d’as relacions con lo Chusticia, asinas como per los miembros d’as corporacions locals en o suyo respectivo ambito territorial.

As queixas habrán d’estar siempre formuladas per escrito, exposando con claridat los feitos en os cuals se basan y las posibles prebas en relación a los mesmos.

Son diversas las vías que tiene lo ciudadano pa exposar la suya queixa, como la entrega presencial en las propias siedes d’o Chusticia en cadaúna d’as tres provincias, a traviés d’este portal web, per correu electronico u fisico y fax.

Totas las actuacions debant d’o Chusticia tienen naturaleza gratuita. Manimenos, s’exiche la identificación suficient d’a persona u personas que la formulan, prohibindo-se, en consecuencia, la presentación de queixas anonimas.

Plantiada la citada queixa, lo Chusticia podrá admitir-la a tramite u refusar-la, si bien en este zaguer caso habrá de motivar tal resolución, y informar a lo ciudadano d’as vías mas adecuadas pa satisfer la suya pretensión, estando las causas mas comuns de refús tratar-se d’afers entre particulars, la existencia evident de falta d’irregularidat, estar pendient de resolución chudicial u tratar-se d’un afer en o cual lo ciudadano sía disconforme con bella resolución chudicial.

Admitida la queixa u iniciau lo expedient d’oficio, lo Chusticia d’Aragón adoptará las midas d’investigación que considere oportunas. Podrá dar cuenta a l’organo administrativo, entidat u corporación afectada pa que en o plazo que determine, lo suyo responsable le ninvie un informe escrito sobre la cuestión suscitada, habendo de recordar-se que las autoridaz, funcionarios y tot lo personal dependient de l’Administración habrán de facilitar a lo Chusticia u a aquel en qui delegue, las informacions, asistencia y dentrada a totas las dependencias, centros y organismos.

Igualment habrán de meter a la suya disposición los datos, expedients u cualsequier clase de documento que permita levar a cabo adecuadament l’actuación investigadera.

Una vegada feita la fayena investigadera, si Lo Chusticia descubrise irregularidaz en o funcionamiento de l’Administración, lo meterá en conoiximiento d’o immediato superior hierarquico y, en o suyo caso, d’o Ministerio Fiscal (articlo 21 d’a lei 4/85); d’atra man, lo Chusticia podrá formular a los organismos y autoridaz afectaus advertencias, recomendacions, sucherencias y recordatorios relativos a los suyos debers legals, pero las suyas resolucions no podrán, en garra caso, modificar u anular actos u resolucions administrativas.

Dentro d’as sucherencias formuladas per lo Chusticia, podrá trobar-se la proposición de formulas de conciliación u d’acuerdo pa resolver un problema determinau (articlo 22).

La traducción de los textos en aragonés y catalán de Aragón se ha realizado gracias a la colaboración de l’Academia Aragonesa de la Lengua.